前言
即使你認為執法人員搞錯咗，千祈唔好嘗試作出抵抗。如果你清楚瞭解自己嘅權利，萬一被人拘捕，至少可以幫你冷靜應對。
可以做乜？唔可以做乜？
保持冷靜！只有喺你識得點樣運用自己嘅權利時，你先能夠好好保障自己：
- 瞭解清楚被捕嘅原因。
- 記低執法人員姓名、編號及所屬辦事處。
- 行使緘默權。除咗要向執法人員提供姓名同地址之外，其他問題一概可以不作回答。（對某啲人嚟講，面對問題時好難一直保持不作回應，呢個時候或者你可以簡單表示「我唔回答」。而控方亦唔可以基於你唔回答而假定你有罪）。
- 通知親屬或朋友（最好系時間及金錢上可以給予你支援嘅人，因為你可能需要佢幫你聯絡律師或安排保釋）。
- 可以要求律師名單及聯絡律師（陪同被捕人士落口供或安排保釋系律師嘅日常工作。一個熟悉調查程序嘅律師，絕對可以協助你保障個人利益）。
- 可以要求飲水、食嘢、休息、去廁所（因為拘留時間可能會長達48小時）。
- 如果身體有唔舒服或受傷，記得要求去醫院接受治療。
- 可以拒絕簽署任何文件。
- 要求申請保釋。
- 要求執法人員提供已錄取口供嘅副本。
- 執法人員可能會要求你交出手提電話，最理想嘅情況系交出手提電話之前已將手機上鎖或關機，並且唔好向執法人員提供密碼。大部分情況下，執法人員都唔可以強迫你提供手提電話密碼。
- 唔好拒捕或對與執法人員作出身體接觸。
另外，如果系可行嘅情況下，最好多留意時間。因為你被拘捕/被帶返警署嘅過程中，未必可以隨時知道時間。萬一你需要對執法人員作出投訴，時間同地點將會系重要嘅資訊。
其他事項
如果調查期間，有執法人員表示「你認罪就走得！最多都系判罰款幾百蚊！」呢個時候，你又應該點做？
萬一有執法人員利用你「怕麻煩」嘅心態，誘導你認罪，但你根本無做過或唔清楚有關指控，千祈唔好隨便認罪，並應該立即要求見律師。你要知道，即使你最終被定罪，決定刑罰嘅人亦絕對唔會系拘捕你的執法人員！
被捕一定會有壓力。好多人會誤以為只要同執法人員詳細解釋就可以盡快返屋企。未見到代表你嘅律師之前，唔好同任何人討論案情。
*** ***
江之航，見習律師
（电邮： Arielkong@hkytl.com 电话：+852 3468 7358）
梁延达, 合伙人
（电邮： alfredleung@hkytl.com 电话：: +852 3468 7202)
本文为介绍性文章。其内容以出版日期为准。 它并不构成法律意见，也不应被视为法律依据。在采取任何与本文所涉事项相关的行动前，您应始终根据自身具体情况获取法律意见。文中某些信息可能源自外部渠道，我们对任何此类信息的准确性或时效性不作保证。
